आइतबार ०३ आश्विन २०७८

काठमाडौं ।

सत्तारूढ नेपाल कम्युनिस्ट पार्टी नेकपा (एमाले)भित्रको विवाद अब औपचारिक विभाजनको दिशातिर अघि बढेको छ ।

पार्टीले साधारण सदस्यसमेतबाट कारबाही गरेका वरिष्ठ नेता माधवकुमार नेपालले प्रधानमन्त्री केपी ओलीले अहिले पनि छलछाम गर्न खोजिरहेको बताएका छन् ।

आफूनिकट जनसंगठनहरूको भर्चुअल भेलामा नेता नेपालले नयाँ पार्टी (आन्दोलन) विकास गर्नुको विकल्प नरहेको बताएको एक नेताले जानकारी दिए ।

“मैले गोकर्ण विष्टलाई तीन दिनभित्र छिनोफानो गर्न भनेको थिएँ ।

तर, यसबीचमा ठोस प्रगति भएको छैन,” नेता नेपालको भनाइ उद्धृत गर्दै एक जनसंगठन प्रमुखले भने, “प्रधानमन्त्री ओली सुध्रिने, सच्चिने संकेत मिलेको छैन ।

उनले जेठ २ मा फर्कने भनेर वक्तव्यबाजी पनि गर्न सक्छन् । तर, उनको विगत हेर्दा सम्झौता पालना गर्ने कुरा खण्डित हुने देखिन्छ ।”

नेता नेपालले गत पुस १ गतेको उदाहरण दिएको ती नेताको भनाइ छ ।

नेकपा विवाद उत्कर्षमा पुगेको बेला पुस १ गते असन्तुष्ट तत्कालीन नेकपा अध्यक्ष पुष्पकमल दाहाल र चौथो वरीयताका नेता माधवकुमार नेपाल समूह राष्ट्रपति कार्यालयमा विशेष अधिवेशन माग गर्दै समावेदन दर्ता गर्न राष्ट्रपति कार्यालय पुगेको थियो ।

त्यतिबेला स्थायी कमिटी बैठक चलिरहेको थियो । समावेदन दर्ता गर्न पुगेपछि दुवैतर्फका दोस्रो तहका नेता, सुवास नेम्वाङ, विष्णु पौडेल, घनश्याम भुसाल, योगेश भट्टराईलगायतले राष्ट्रपति कार्यालयमा दर्ता भएको समावेदन फिर्ता गर्ने र प्रधानमन्त्रीले संवैधानिक परिषद्सम्बन्धी अध्यादेश खारेज गर्ने सहमति भएको थियो ।

सहमति मुतावित आफूहरू राष्ट्रपति कार्यालय (शीतलनिवास)बाट फिर्ता भएको तर, ओलीले अध्यादेश फिर्ता नलिई त्यही आधारमा निर्णय, नियुक्ति–सिफारिस प्रक्रिया अघि बढाएको नेता नेपालले बुधबारको भर्चुअल भेलामा बताएका थिए ।

यसले पनि ओली सम्झौताप्रति पटक्कै इमान्दार हुँदैनन् भन्ने प्रमाणित गर्ने नेता नेपालको भनाइ रहेको भर्चुअल भेलाका सहभागी बताउँछन् ।

“त्यसकारण ओलीको छलछाममा अल्झने कुरा छैन । अहिले अदालतमा मुद्दा विचाराधीन छ ।

संसद् पुनःस्थापनाको सम्भावना छ । यसले पनि उनले अल्झाउन खोजेका हुनसक्छन् ।

उनीलाई सांसदहरू देखाउन पर्ने पनि हुनसक्छ । तर, आउने आउँछन्, नआउने आउँदैनन् ।

हामी ओलीको कुरामा मख्ख पर्नेवाला छैनौँ,” नेता नेपालको भनाइ उद्धृत गर्दै अर्का जनसंगठनका नेताले भने ।

त्यस्तै नेता नेपालले अहिले दोस्रो तहका नेताहरूको छलफलबारे आफूलाई धेरै थाहा नभएको बताएका थिए ।

“घनश्याम भुसाल, सुरेन्द्र पाण्डे, गोकर्ण विष्ट, योगेश भट्टराईहरूसँगको छलफलबारे उहाँले धेरै खुलाउनु भएन, बरु अनभिज्ञता प्रकट गर्नुभयो । त्यसको उपादेयता नरहने बताउनुभयो ।

ओलीले सम्झौता पालना गर्दैनन् । धोका दिन्छन् भन्ने नै उहाँको निष्कर्ष थियो,” ती नेताको भनाइ छ ।

खनाल–नेपाल समूहनिकट युवा संघ नेपालका अध्यक्ष नरेश शाहीले नेता नेता नेपालले अहिले पनि आफू एकताकै पक्षमा अडिग रहेको तर ओलीको व्यवहारले त्यो सम्भावना दूर रहेको बताएको जानकारी दिए ।

नेता नेपालले जेठ २ मा फर्कने हो भने त्यसको इमान्दार कार्यान्वयनको विश्वास दिलाउनुपर्ने बताएको शाहीको भनाइ थियो ।

“जेठ २ मा फर्कने प्रतिबद्धता जनाएर मात्र हुँदैन । त्यसको इमान्दार कार्यान्वयन हुनुपर्छ । फागुन २३ अघि र फागुन २८ पछि गरिएको सम्पूर्ण निर्णय खारेज हुनुपर्छ । एक व्यक्ति एक पद लागु हुनुपर्छ ।

नवौं महाधिवेशनबाट पारित विधानको अक्षरशः पालना हुनुपर्छ । तर ओलीबाट त्यो सम्भावना देखिएको छैन,” नेता नेपालको भनाइ उद्धृत गर्दै शाहीले भने ।

जनसंगठन प्रमुखहरूले पनि रूपान्तरणसहितको पार्टी एकता आवश्यक रहेको औंल्याएको शाहीको भनाइ थियो ।

“यथास्थितिमा, यही हालतमा ओलीसँग मिलेर जानुको कुनै अर्थ छैन । पार्टी दक्षिणपन्थी भासमा गइसकेको छ । कम्युनिस्ट आन्दोलनभित्रको लोकतान्त्रिकीकरण पनि क्षयीकरणको दिशामा गइसकेको छ ।

हामीलाई रूपान्तरण क्रान्तिकारी चेतसहितको पार्टी चाहिएको छ,” जनसंगठनका अध्यक्षहरूले राखेको कुराको सार खिच्दै नेता शाहीले भने ।

https://baahrakhari.com/ बाट साभार गरीएको हो ।


Last Updated on: June 6th, 2021 at 9:55 pm
२१३ पटक हेरिएको

तपाईको प्रतिक्रिया