शुक्रबार ०४ आषाढ २०७८

चितवन –

यहाँको प्रमुख भरतपुर महानगरपालिकामा कोरोना महामारीमा संक्रमितलाई सहज उपचार, अस्तपताल, आइसोलेसन र निःशुल्क दाहसंस्कारको व्यवस्था मिलाउनु जनप्रतिनिधिको दायित्व हो।

तर, महानगरमा मृत्युको संस्कारमा ब्रम्हलुट गरेको खुलेको छ। महानगर अन्तर्गतको देवघाटस्थित दियालो बंगलानजिक नारायणी नदी किनारमा संक्रमितको शव जलाउन ठाउँमा एउटा शव जलाएको २८ हजार रुपैयाँ लिने गरेको पाइएको छ।

मृत्युपछिको मानवीय पीडा र संवेदना बिर्सिएर महानगर लासबाट समेत असुलीमा लागेको पाइएको छ।

यसको भुक्तभोगी भरतपुर महानगरपालिका–१ रामनगरका केशव रिमाल पैसा नहुने मान्छेले के गर्लान भनि आक्रोश पोख्छन्।

कोरोनाबाट निधन भएका आफन्तको दाहसंस्कारमा सहभागी हुन घाट पुगेका उनले शव जलाउँदै गर्दा शुल्क बापत २८ हजार रुपैयाँ मागेको देखे।

घाट जान पैसा बोकिएको थिएन। सबैसँग मागेर काम चलाइयो। आफन्त वित्नुको पीडा, दाहसंस्कार गर्नुको पीडा त छँदैथियो त्यसमाथि शुल्कको पीडा पनि थपियो। रिमाल र उनका आफन्तलाई यति शुल्क लाग्छ भन्ने जानकारी थिएन।

अस्पतालबाट निस्केको मान्छे घाटमा पुग्दा सबैसँग पैसा नै हुन्छ भन्ने पनि हुँदैन।

त्यसमाथि सक्नेले त २८ हजार रुपैयाँ पनि सजिलै तिर्लान्, नहुनेका लागि त यो रकम धेरै हो रिमालको नजरमा।

उनले यसलाई घटाउन माग गरे। बढिमा १० हजार भन्दा बढी नलाग्नेमा चर्को असुली भइरहेको उनको गुनासो छ।

चितवनका प्रमुख जिल्ला अधिकारी प्रेमलाल लामिछानेले पनि बढि शुल्क लिइरहेको गुनासो आएको भन्दै कसरी घटाउने भन्नेबारे छलफल गरिरहेको बताए। यो खबर हामीले नेपालपानाबाट लिएका हौ – सम्पादक

 


Last Updated on: May 17th, 2021 at 8:37 pm
१०७ पटक हेरिएको

तपाईको प्रतिक्रिया